ZUINGERUS Johannes

ZUINGERUS Johannes

Theodori fil. Theologus item Basiliensis insignis. Natus A. C. 1634. post linguarum Artiumque curriculum promptâ felicitate emensum, Theologiae, ad magni parentis exemplum, se totum dedit, tyrociniis eius ad tanti Gamalielis pedes in patria depositis. Inde Genevae aliquandiu Ecclesiastem Teutonicum egit: Germaniae dein Belgiique Ecclesiis aditis, praeter alios, Ioh. Crocium Marpurgi, et Samuelem Maresium Groningae, Theologos nostri temporis summos, docentes audiit. Eôdem postmodum, quô in patriam reversus est, die, Graecam Professionem, velut hereditariam familiae, nactus A. C. 1656. Postmodum Theologiae Professor, Locos Communes et Controvers. Theol. cum fructu aliquandiu tractavit; Inde iam Novi Testamenti provinciae exornandae summâ fide industriâque incumbit. Pater egregiae prolis. Eius exstant: Oratio de Barbarie superior. saeculorum: Disputationes Philos. et Theol. quam plurimae: etc. Idem Parentis Syntagma Exercitationum edidit.

O nimium dilecta Deo gens, lumina porro

Spargere ne Patriae desine, neve polo!